ვინ გახდება პრემიერლიგის საუკეთესო ფეხბურთელი?

AutoSharing Option
ორი თვეც და ისტორიის კუთვნილება გახდება პრემიერლიგის რიგით ოცდამეხუთე გათამაშება.

ფეხბურთში მოვლენებს იშვიათად უსწრებენ, მაგრამ თითქმის ასპროცენტიანი ალბათობით შეიძლება ითქვას, რომ პრემიერლიგას მოიგებს "ჩელსი", სეზონის საუკეთესო მწვრთნელი კი ანტონიო კონტე გახდება. საუკეთესო ფეხბურთელობის ყველაზე დიდი შანსი კი "არისტოკრატთა" ფრანგ საყრდენს, 26 წლის ნგოლო კანტეს აქვს.

ინგლისური ფეხბურთის ლეგენდამ, ალან შირერმა ეს მოსაზრება რამდენიმე ვარაუდით გაამყარა. და მართლაც, დიდებულ ფორმაში მყოფი ფრანგის წარმატება არავის უნდა გაუკვირდეს. ის მომწიფდა დიდი ჯილდოების მოსაგებად.

კანტეს შემთხვევა დიდი გამონაკლისი იქნება. როგორც წესი, მისი ამპლუის ფეხბურთელები
განებივრებულნი არ არიან ინდივიდუალური ჯილდოებით. ეს იმ ართმევას ჰგავს, რომლითაც კანტემ ყოველ უქმეებზე პირდაპირ სისხლი გაუშრო პრემიერლიგისა და მსოფლიო ფეხბურთის ვარსკვლავებს.

პრემიერლიგაში სეზონის საუკეთესო მოთამაშეს 1995 წლიდან ასახელებენ. სულ ლაურეატთა სიაში 19 ფეხბურთელია და რა ფეხბურთელები - ანრი, კრიშტიანო, ბეილი, ოუენი... ცხადია, ლიგა შემტევ კადრებს ანიჭებს უპირატესობას. რა თქმა უნდა, ხდებოდა ისეც, რომ პრემიერლიგაში აღიარებდნენ მცველსა და მეკარეს - ნემანია ვიდიჩს (ორი ჯილდო) და პეტერ შმეიხელს, ვენსან კომპანის, პატრიკ ვიეირას...

ამ ფეხბურთელებიდან ყველას ჰქონდა თავისი განუმეორებელი ქარიზმა. და რომელ მათგანს ჰგავს ნგოლო? ჩვენი აზრით, არც ერთს.

გამონაკლისი 2011 წელს მოხდა. ჟურნალისტებმა სკოტ პარკერი გამოარჩიეს. მაშინ ეს არჩევანი ბევრმა გააკრიტიკა, მაგრამ ჩაითვალა, რომ ეს იყო რევერანსი ინგლისური ფეხბურთისადმი და დაფასება 30 წლის მოთამაშისა, კარიერაში გამორჩეული სეზონი რომ ჩაატარა.

და რამდენჯერ გინახავთ დიდი ჯილდოებით ხელდამშვენებული საყრდენები? ყველას მოსწყინდა ის, რომ მათი შრომა ძალიან ჩრდილშია. ყველა ხედავს ფინტებსა და გოლებს, მათი შრომის გამორჩევა კი ძალიან ხშირად ავიწყდებათ. თამამად შეიძლება ითქვას, რომ ეს არის ყველაზე დაუფასებელი ამპლუა ფეხბურთში. კანტეს საუკეთესოდ დასახელების შემთხვევაში ეს იქნება ერთგვარი ბოდიში და იმ კლიშეს უგულებელყოფა, რომელიც მართლაც არსებობდა წლების განმავლობაში.

და რაც მთავარია, კანტე ძალიან კარგია. უკვე ორი წელია, ის კლუბები, სადაც ნგოლო თამაშობს, სხვებზე ხშირად იმარჯვებენ. ბოლო ორი სეზონის განმავლობაში საკმარისია ნგოლო გყავდეს და ეგრევე დიდ ნაბიჯს დგამ ჩემპიონობისაკენ. კანტეს ტრანსფერს უკვე დიდია ხანია, "ჩელსიში" "წლის გარიგება" დაარქვეს.

კანტეს თამაშის მანერით აღტაცებული და გაკვირვებულია კანტეს ტოლი ედენ აზარი. "ისეთი შთაბეჭდილება მექმნება, რომ მინდორზე გამოდის არა ერთი, არამედ რამდენიმე კანტე. გაიხედავ და ყველგან ისაა", - ამბობს ბელგიელი. გარდა ამისა, გარი ნევილს უნდა, რომ ფრანგი "მანჩესტერში" იხილოს. ნებისმიერისათვის დიდი აღიარებაა, როცა ფრენკ ლამპარდი მსოფლიოს საუკეთესო ნახევარმცველს გიწოდებს. ტიერი ანრიმ კი სულაც სასწაული ჩაიდინა. მან ხელი შეახო ნგოლოს და მოსინჯა, რეალური ადამიანია თუ არაო.

"გასულ კვირას "ჩელსის" ბაზაზე ვიყავი. მინდოდა, ედენ აზარი მენახა. პირველი, ვინც დავინახე, ნგოლო კანტე იყო. მე მას თითი ვკარი მკერდში და ვუთხარი, ეს იმიტომ გავაკეთე, მინდოდა, შენს რეალურობაში დავრწმუნებულიყავი-მეთქი. პასუხად მან გაიცინა", - ამბობს ანრი.

"რა თქმა უნდა, ყველაფერი დამოკიდებული იქნება იმაზე, თუ ვის ექნება მეტი ხმა, მაგრამ მე ვერ ვხედავ ერთ მიზეზსაც კი, თუ რატომ ვერ უნდა გახდეს კანტე პრემიერლიგის საუკეთესო ფეხბურთელი. არის ბევრი პრეტენდენტი - იბრაჰიმოვიჩი, ლუკაკუ, სანჩესი, დე ბრუინი და სხვები, მაგრამ კანტე საუკეთესოა.

ის იმდენად გამორჩეულია, რომ არ შეიძლება, ყურადღება არ მიაქციო. რა თქმა უნდა, დიდებულია აზარის არანორმალური გოლების ცქერა, მაგრამ ჩვენ უნდა მივაქციოთ ყურადღება, რას აკეთებს კანტე. ეს შეუფასებელი შრომაა", - აგრძელებს ფრანგული და მსოფლიო ფეხბურთის ცოცხალი ლეგენდა.

კანტე პიროვნულადაც ძალიან კარგი ბიჭია. ფრანგულ "კანში" თამაშის დროს მან დიდხანს იარა სკუტერით და მანქანა მხოლოდ მას შემდეგ იყიდა, რაც დედასთან კარგა ხანს ითათბირა. ის ცოტას საუბრობს, ხშირად იღიმება და არასოდეს დადის ხმაურიან საღამოებზე. ის თავის როლზე საუბარს ერიდება და ყველას ურჩევს, ყურადღება გაამახვილონ ედენ აზარზე, დავიდ ლუისზე და სხვებზე.

ანტონიო კონტე კი, "ჩელსის" ძალიან მომთხოვნი მწვრთნელი, მაინც პოულობს მიზეზს შენიშვნისათვის. "არსენალთან" მატჩის შემდეგ მწვრთნელმა თქვა, რომ ნგოლომ შექმნაში უნდა მოუმატოს.

"ის პირველ პასს ძალიან ხშირად აკეთებს ჰორიზონტალურად. უმჯობესი იქნება, წინ გააკეთოს პასი და მოუმატოს თამაშის შექმნაში. მე კარგად ვიცი, რა არის ეს პრობლემა, რადგან როცა მე ვთამაშობდი, ეს ჩემი პრობლემაც იყო", - თქვა კონტემ.

შანსი აქვს ედენ აზარს. ბელგიელი უფრო მრავალმხრივი გახდა ჩაგდებული სეზონის შემდეგ. აზარი უფრო ნაცნობია, ვიდრე კანტე. ჩვენ მას უკვე კარგა ხანია, ვხედავთ პრემიერლიგაში.

საინტერესოა, რომ BBC-ის ექსპერტთა გამოკითხვაში (მარკ შვარცერი, კრის სატონი, კრის უოდლი და სხვა დამსახურებული პერსონები) კანტე აზარს 9:3 უგებს. ერთ-ერთი, ვინც ბელგიელისკენაა, გახლავთ "ლივერპულის" ყოფილი ფეხბურთელი, დენი მერფი:

"რით არის აზარი კანტეზე უკეთესი? ფეხბურთში დგება მომენტი, როცა რაღაც არაორდინარული უნდა გააკეთო. აზარს შეუძლია, მთელი თამაში შეცვალოს. კიდევ რომ მოქმედი ფეხბურთელი ვიყო და "ჩელსისთან" რომ ვთამაშობდე, გაცილებით გამეხარდებოდა აზარის არყოფნა, ვიდრე კანტესი", - მიიჩნევს მერფი.

და მაინც, კანტეს შანსები უფრო მაღალია...

ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული