პაკო აქა, მუნირი იქა - კატალონიურ-ვალენსიური როქი

სატრანსფერო ზაფხული ბოლოსწინა დღეს კატალონიურ-ვალენსიური როქით დასრულდა - "ბარსელონამ" "ვალენსიას" შეტევის ლიდერი პაკო ალკასერი იყიდა და "ღამურებში" იჯარით მუნირ ელ ჰადადი გაუშვა.

2016/17 წლების სეზონის "ბარსელონა" საბოლოოდ დაკომპლექტდა, ტორტის ბოლო ნაჭერი საკმაოდ მსუყედ გამოიყურება - "ვალენსიასა" და ესპანეთის ნაკრების ფორვარდი პაკო ალკასერი "ბარსელონასთვის" შეუტევს.

"მარკას" ინფორმაციით, "ღამურებს" ეს ტრანსფერი 30 მილიონი ევროთი გაამდიდრებს, რომელსაც მომავალში დაახლოებით 2 მილიონი ევრო ბონუსებად დაემატება (ეს თანხა მოგვიანებით, ოფიციალურმა წყარომაც დაადასტურა). პაკომ სამედიცინო შემოწმება ადრევე, მადრიდში გაიარა, ამიტომ უბრალოდ საჭირო იყო ხელშეკრულებაზე ხელის მოწერა და მედიის წინაშე ახალი მაისურით გამოჩენა.

ალკასერმა 2021 წლამდე გააფორმა ხელშეკრულება. ამ ხუთი წლის განმავლობაში მისი მსურველი კლუბი "ბარსელონასთან" წინადადებით და 100-მილიონიანი ჩეკით უნდა მივიდეს. ტრანსფერის ნაწილია მუნირ ელ ჰადადის "ბარსადან" "ვალენსიაში" ერთწლიანი იჯარით გადასვლა.

ლუის ენრიკეს თავიდან კევინ გამეიროს შეძენა სურდა, მაგრამ კატალონიელებს "ატლეტიკომ" დაასწრო, ამიტომ ფრანგი ფორვარდის ალტერნატივად მწვრთნელმა პაკო დაისახა და მიზანსაც მიაღწია. სხვათა შორის, პაკო 23 წლის სწორედ გუშინ გახდა და შესანიშნავი საჩუქარიც მიიღო.

პაკომ გზა "მესტალიიდან" "კამპ ნოუმდე" უკვე გაკვალული ბილიკებით გაიარა. ბოლო წლებში "ბარსელონაში" "ვალენსიას" ფეხბურთელებზე დიდი მოთხოვნაა და მათში კარგადაც იხდიან. ბოლო ექვს სეზონში "ვალენსიამ" 5 ფეხბურთელი გაყიდა "ბარსელონაში" და ჯამში 139 მილიონი ევროც მიიღო. შეგახსენებთ, რომ ამ სეზონში "ღამურებმა" ესპანეთის ჩემპიონს ევროპის ჩემპიონი ანდრე გომეში მიჰყიდეს, რომლის სანაცვლოდაც 35 მილიონი ევრო მიიღეს, ბონუსებად კი 20 მილიონ ევროს ელიან.

"ბარსელონაში", როგორც წესი, არ სწყალობენ ესპანელ ფორვარდებს - გუნდი ან ადგილობრივი კადრებით კომპლექტდება შეტევაში, ან ლეგიონერებით. წარმოიდგინეთ, 1980 წლის მერე "ბარსამ" მხოლოდ 10 ესპანელი ფორვარდი დაიმატა. პირველი ქუინი იყო, ბოლო კი პაკოა.

ბოლო 16 წელიწადში კატალონიელებმა ერთადერთი ესპანელი ცენტრფორვარდი იყიდეს, დავიდ ვილია. ეს 2010 წელს მოხდა (სხვათა შორის, ეს ტრანსფერიც "ვალენსიადან" განხორციელდა). ვის არ ნახავდით "ბარსას" შეტევის ხაზში: რონალდოს, სავიოლას, რონალდინიოს, ლუის სუარესს, რივალდოს, ჰენრიკ ლარსონს, ზლატან იბრაჰიმოვიჩს, ტიერი ანრისა და სხვებს, მაგრამ იშვიათი გამონაკლისის გარდა, იქ ნაყიდი ესპანელი ფორვარდები არ თამაშობდნენ. ვილია "ბარსელონას" ისტორიაში ყველაზე მეტი გოლის ავტორია ნაყიდ ესპანელ ფორვარდებში - "ელ გუახემ" "ბარსას" მაისურით 119 მატჩში 48 გოლი გაიტანა.

პაკო ვალენსიას მხარეში, ქალაქ ტორენტში დაიბადა. "ვალენსიაში" (და "ხეტაფეში" იჯარით) მან სამ სეზონში 146 მატჩი ითამაშა. 2014 წლის სექტემბერში მას დებიუტი ესპანეთის ეროვნულ ნაკრებში ჰქონდა. 13 სანაკრებო მატჩში მან 6 გოლი გაიტანა. ბოლო სეზონში პაკო გარი ნევილმა "ვალენსიას" კაპიტნად დანიშნა.

პაკო ალკასერი: "როცა კი გავიგე "ბარსელონას" ინტერესის შესახებ, პირდაპირ ვუთხარი კლუბის პრეზიდენტს, რომ გავეშვი, რადგან ეს კარგი იქნებოდა ჩემი კარიერისთვისა და "ვალენსიასთვის". ზოგი, ალბათ, ვერ გაიგებს ჩემს გადაწყვეტილებას, მაგრამ იმედია, პატივს სცემენ მას.

"ვალენსია" ყოველთვის დარჩება ჩემს გულში და როცა საშუალება მომეცემა, აუცილებლად ვივლი "მესტალიაზე" "ვალენსიას" საქომაგოდ. ძალიან მონდომებული ვარ და ერთი სული მაქვს, როდის დავიწყებ ჩემი კარიერის ახალ ეტაპს. ჩემთვის დიდი პატივია მესის, სუარესისა და ნეიმარის თანაგუნდელობა. ეს სამი ფეხბურთელი მსოფლიოში საუკეთესოებად მიმაჩნია".

ფეხბურთელი ახლა ესპანეთის ნაკრებს შეუერთდება და "ფურია როხასთან" ერთად ბელგიასთან მატჩისთვის მოემზადება.

მაშ ასე, ლუის ენრიკემ დაასრულა გუნდის დაკომპლექტება. რა შეცვალა მან? "ბარსა" საკმაოდ აქტიური იყო, ბევრი ფეხბურთელი დაიფერთხა და ბევრიც აიყვანა. მაგრამ გუნდს, თითქოს, არც გაუყიდია და არც უყიდია სასტარტო თერთმეტეულის წევრი. ლუის ენრიკეს საკადრო რევოლუცია ძირითადად სათადარიგოთა სკამს შეეხო.

ახლა გუნდს ჰყავს პაკო, რომელიც საქვეყნოდ ცნობილ ტრიდენტს დაეხმარება. გუნდში ანდრე გომეში, დენის სუარესი, შუახაზს გააძლიერებენ; სამუელ უმტიტი და ლუკა დინი დაცვას გააძლიერებენ, იასპერ სილესენი კი, სავარაუდოდ, ტერ შტეგენის შემცვლელი იქნება.

"ბარსელონადან" ამ ზაფხულს 13 ფეხბურთელი წავიდა და მხოლოდ ორს ეთქმოდა სასტარტო თერთმეტეულის წევრი (ბრავო, დანი ალვეში). 13-დან 5 გაანათხოვრეს, 8 კი საბოლოოდ გაყიდეს (ან თავისუფალ აგენტებად წავიდნენ). ახლა კი მხოლოდ დრო გამოაჩენს, რამდენად მართალი იყო ლუის ენრიკე, როცა ეს საკადრო რევოლუცია ჩაიფიქრა.

მუნირ ელ ჰადადი "ვალენსიას" ფეხბურთელია. ის "ღამურებს" პაკოს "ხურდაში" ერგო - 20 წლის ფორვარდი ამ სეზონში იჯარით ითამაშებს "მესტალიაზე". მან უკვე მიიღო მე-9 ნომერი, რომელიც აქამდე სწორედ ალკასერის საკუთრება იყო.

მუნირმა "სელტაში" გადასვლაზე უარი თქვა, მაგრამ "ვალენსიაში" სიამოვნებით წავიდა. პაკო აიესტარანის გუნდს სეზონის ბოლოს მუნირის გამოსყიდვა შეუძლია, თუკი 12 მილიონ ევროს გადაიხდის, რაც არც ისე დიდი თანხაა ესპანეთის ნაკრების ახალგაზრდა ფორვარდის სანაცვლოდ.

"ძალიან ბედნიერი ვარ "ვალენსიაში" გადმოსვლით. ჩემთვის ეს ამბიციური გამოწვევაა. ასეთ შანსს ხელიდან ვერ გავუშვებდი. "ვალენსია" დიდი კლუბია, ის ყოველთვის ტოპ-გუნდი იყო და იმედი მაქვს, რომ ისევ დაუბრუნდება ამ დონეს. ჩემი მხრიდან ყველაფერს გავიღებ "ვალენსიას" წარმატებისთვის. დარწმუნებული ვარ, რომ აქ კიდევ უფრო გავიზრდები, როგორც ფეხბურთელი", - განაცხადა მუნირმა.

ყოველდღიური სპორტული გაზეთი "ლელო"