დავით კირკიტაძე კარიერას ისრაელში, ნაზარეთის "ჰაპოელში" გააგრძელებს

საჩხერის "ჩიხურას" ნახევარმცველი დავით კირკიტაძე კარიერას ისრაელში გააგრძელებს. როგორც 23 წლის ნახევარმცველმა Sportall.ge-ს განუცხადა, ის ქვეყნის რანგით მეორე, ლეუმით ლიგაში მოასპარეზე "ჰაპოელ ნაზარეთში" წავიდა, სადაც უახლოეს 10 თვეს გაატარებს.

"მქონდა ვარიანტები სხვადასხვა გუნდიდან, არაერთი შემოთავაზება საქართველოდანაც იყო, მაგრამ, საბოლოოდ, ისრაელში წასვლა ვამჯობინე. აქ უფრო მეტად განვვითარდები, ვიდრე საქართველოში. საფეხბურთო ატმოსფეროც უკეთესია.

10-თვიან კონტრაქტს მოვაწერე ხელი, რის შემდეგაც ეს ხელშეკრულება გადაიხედება და ორმხრივი სურვილის შემთხვევაში, კიდევ 10 თვით გახანგრძლივდება.

მსურს, მთელი გულით წარმატებები ვუსურვო "ჩიხურას" ევროასპარეზზე. მგონია, რომ საკმაოდ კარგად იასპარეზებენ", - გვითხრა კირკიტაძემ.

კირკიტაძეს, რომელსაც სამშობლოში "ჩიხურას" გარდა, "სამტრედიაში", ქუთაისის "ტორპედოში", რუსთავის "მეტალურგსა" და "ზუგდიდში" უთამაშია, ისრაელში თამაშის გამოცდილება აქვს - ის ტიბერიის "ირონის" ღირსებას იცავდა.