ფრანგული ვერსია: ჯაბა კანკავამ შეიძლება "რეიმსი" დატოვოს

დარჩება თუ არა საქართველოს ეროვნული ნაკრების კაპიტანი ჯაბა კანკავა ფრანგულ "რეიმსში"? როგორც იქაური მედია წერს, ეს საკითხი ჯერაც გაურკვეველია და ყველაფერი იმაზეა დამოკიდებული, შეინარჩუნებს თუ არა კლუბი ადგილს ქვეყნის ელიტურ საფეხბურთო დივიზიონში.

ფრანგები წერენ, რომ იმ შემთხვევაში, თუ "რეიმსს" უძლიერესთა რიგებთან გამომშვიდობება მოუწია, კანკავა გუნდს აუცილებლად შეიცვლის. ფრანგული მედიიდანვე ვიგებთ, რომ საქართველოს ნაკრების კაპიტნის სამსახურით რამდენიმე ადგილობრივი კლუბია დაინტერესებული, თუმცა კონკრეტიკისგან თავს იკავებენ.

ეროვნული ნაკრების 30 წლის კაპიტანი "რეიმსში" დნეპროპეტროვსკის "დნიპროდან" მოხვდა. ჯაბას თავიდანვე არ დაუყენებია ეჭვქვეშ თავისი სტატუსი - ის უმალ "რეიმსის" ძირითადი შემადგენლობის მოთამაშედ იქცა.

ამ დროისთვის გუნდი გასავარდნ ზონაშია. პირველობის ბოლომდე 2 ტური დარჩა. "რეიმსს" მართლაც რომ ურთულესი კალენდარი აქვს. თავად განსაჯეთ - კანკავასა და მის თანაგუნდელებს საგარეო მატჩი ელით "მარსელთან", ხოლო შინ "ლიონს" ელოდებიან.

კაცმა რომ თქვას, "რეიმსმა" თავად ჩაიგდო თავი ამ დღეში, როცა რამდენიმე უმნიშვნელოვანესი მატჩი ვერ მოიგო, თუნდაც გასულ უქმეებზე, როცა შინ თითქმის უმოტივაციო "მონპელიესთან" დაყარა ფარ-ხმალი (2:3).

ახლა როგორია ამ მდგომარეობიდან თავის დაღწევა, მალე გამოჩნდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"