დიდი ხანია, საქართველოს ნაკრებისთვის სუსტი და იოლი მეტოქეები აღარ არსებობენ, რადგან ცუდი შედეგების გამო ჩვენი ეროვნული გუნდი დაბალ კალათაშია მოკალათებული. მაგრამ ჩვენი დონის გუნდებიდან თუკი რომელიმე გამორჩეულად უხერხული მეტოქე იყო, ეს უპირველესად ლატვიაზე ითქმის. ბალტიისპირელებმა რამდენიმე შესარჩევ ციკლში ლამის გარანტირებული 3 ქულა და მასთან ერთად, იმედიც წაგვართვეს. ბოლოს კი "მიხეილ მესხზე" გამართული მატჩში გაგვამწარეს, როცა 0:1 წავაგეთ.მათთან არათუ ხუთი გოლი არ გაგვიტანია, ამ შეხვედრასაც ბევრი შიშით ელოდა. ახლა კი ბალტიისპირელებს დუბლი ერთდროულად ჯანო ანანიძემ და გიორგი ქვილითაიამ შეუსრულეს. ვენის
- საქართველო-ლატვია 5:0 - ოქროს კოშკების გარეშე [VIDEO+PHOTO]
საერთოდ, გიორგი მთელი შეხვედრა აქტიურობდა და ამ მომენტის გარდა, კიდევ რამდენიმე მწვავე შეტევის მონაწილე გახლდათ, ბევრს მოძრაობდა, მცველებს ამოსუნთქვის საშუალებას არ აძლევდა და რაც ყველაზე მთავარია - როგორც იქნა, ნაკრებში გაიხსნა და გაიტანა. ეს მისთვისაც მნიშვნელოვანი იყო და ნაკრებისთვისაც და იმედია, ოფიციალურ შეხვედრებშიც გაგვახარებს.
"ლელომ" გიორგი ქვილითაიას მცირე ინტერვიუ ჩამოართვა...
- უპირველესად, გამარჯვებას და დუბლს გილოცავ. მოდი, ჯერ თამაში შევაფასოთ...
- კმაყოფილი ვარ მეც, გუნდიც და იმედია, გულშემატკივარიც. როგორც იქნა, ნავსი გავტეხეთ და დიდი ხნის შემდეგ გავიმარჯვეთ. რაც მთავარია, ლამაზი ფეხბურთი ვაჩვენეთ და ბევრი გავიტანეთ. მართალია, ეს ამხანაგური შეხვედრა იყო, თუმცა გამარჯვება ფსიქოლოგიურად ძალიან გვჭირდებოდა. გამოჩნდა, რომ მოგებაც შეგვძლებია და ხარისხიანი თამაშის ჩვენებაც.
ვერ წარმოიდგენთ, გუნდისთვის, თითოეული ფეხბურთელისთვის რამდენად მნიშვნელოვანი იყო, რომ სერბეთთან წაგების მიუხედავად, ხალხი მაინც რომ მოვიდა და გვამხნევებდა.
ბუნებრივია, ბედნიერი ვარ, ნაკრებში პირველად რომ გავიტანე და თანაც დუბლი რომ შევასრულე. იმედია, ოფიციალურ შეხვედრებშიც გავიტან.
- ასაკობრივ ნაკრებებში დუბლი ოდესმე შეგისრულებია?
- ასაკობრივი ნაკრებებიდან მხოლოდ 19-წლამდელებსა და ახალგაზრდულში მითამაშია, მაგრამ დუბლი არ გამიტანია. თამაშის შემდეგ ვფიქრობდი, გუნდში რომ გაგაქვს და გულშემატკივარს ახარებ, ეს ყოველთვის დიდი განცდაა. მაგრამ შენი ქვეყნის ნაკრებში რომ გიწვევენ და საკუთარ ხალხს ახარებ, ეს ბევრად უფრო დიდი სიხარული და აბსოლუტურად სხვა ემოციაა. თანაც, ამას "დინამო-არენაზე" რომ ახერხებ, ამ განცდის გადმოცემა შეუძლებელია.
მე ყოველთვის ვიტყვი, რომ საქართველოს ნაკრებს მაგარი გულშემატკივარი ჰყავს.
- საერთოდ, მოგებაზე არანაკლებ იმან გაგვაოცა, რომ თავისუფლად თამაშობდით. ფსიქოლოგიური წნეხისგან ასე იოლად როგორ გათავისუფლდით?
- ვერ ვიტყვი, რომ დასაწყისში თავისუფლად ვთამაშობდით. კარგად ვიცოდით, რომ სერბეთთან წაგების გამო ხალხი განაწყენებული იყო და ჩვენზე ხელი ჰქონდა ჩაქნეული. ამას ვგრძნობდით და ეს ცუდად მოქმედებდა. მაგრამ ჯერ ანგარიში გავხსენით, მერე მეორე გავიტანეთ, მეორე ტაიმში კი ლატვიას შანსი აღარ დავუტოვეთ.
- პირადად შენ გეტყობოდა, რომ ვენის "რაპიდში" გადასვლამ უფრო თავდაჯერებული გაგხადა...
- რა თქმა უნდა, ასეთ კლუბში რომ მოხვდები, ეს მოქმედებს. მიმდინარე სეზონში ჯერ ხუთი გოლი გავიტანე, მაგრამ ადაპტაციას გავდიოდი და იმედი მაქვს, რომ სეზონის ბოლომდე კიდევ გავიტან.
- უცნაური თამაში იყო, რადგან საქართველოს ნაკრებს ყველაფერი გამოსდიოდა. ლატვია გრანდი არაა, მაგრამ არც სან მარინო ან ანდორაა, ასეთი ანგარიშით რომ მოუგო. თანაც, ჩვენთვის ძალიან უხერხული მეტოქეა ისტორიულად...
- სხვათა შორის, დღეს სწორედ ამას ვგრძნობდი, რომ ჩვენკენ იყო იღბალი, რომელიც აქამდე არ გვწყალობდა. იმავე სერბეთთან, ირლანდიასთან, უელსთან და მოლდოვასთან უიღბლობის გამო უმნიშვნელოვანესი ქულები დავკარგეთ. ძალიან რეალურ საგოლე მომენტებს ვქმნიდით და ვერ ვიყენებდით. რა გვჭირდა, ამის ახსნა შეუძლებელია. დღეს კი ყველაფერი გამოგვდიოდა.
- ბევრი თვლის, რომ საქართველოს ნაკრებს მეტი პოტენციალიც გააჩნია, ვიდრე ეს ქულებში აისახება. მაგრამ ისიც ჩანს, რომ ძლიერ მეტოქეებთან საკუთარი ძალის ბოლომდე არ გჯერათ. იმავე სერბეთთან, კარგი პირველი ტაიმი ჩაატარეთ და მაინც წააგეთ. ასე ბევრი თამაშის გახსენება შეიძლება...
- გეთანხმებით, სერბებთან პირველი ტაიმი კარგად ვითამაშეთ, თუმცა ბოლო წუთზე გატანილმა გოლმა ხასიათი გაგვიფუჭა და ცუდად იმოქმედა.
საერთოდ, ასეთი რამ ბევრჯერ მოგვსვლია და სულ ვფიქრობდი, რა გვჭირდა. იმედია, ლატვიის შემდეგ მაინც შემოტრიალდება საქართველოსკენ საფეხბურთო ფორტუნა და ხალხს გავახარებთ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
