თბილისის "დინამო" იურაი იარაბეკს, სავარაუდოდ, ხვალ დაითხოვს

სავარაუდოდ, თბილისის "დინამოს" იურაი იარაბეკი აღარ გაწვრთნის. როგორც ჩვენთვის გახდა ცნობილი, იარაბეკს "დინამოს" ხელმძღვანელობა კლუბიდან ხვალ დაითხოვს.

იარაბეკს "დინამოსთან" მოქმედი კონტრაქტი დეკემბრამდე აქვს და როგორც კლუბის პრეზიდენტმა რომან ფიფიამ განაცხადა, სლოვაკი "დინამოს" კონტრაქტის ამოწურვამდე გაწვრთნიდა, შემდეგ კი თბილისელებს ახალი მთავარი მწვრთნელი ეყოლებოდათ, მაგრამ მას მერე, რაც უმაღლეს ლიგაში "დინამომ" ზედიზედ 3 ტურში ვერ იმარჯვა, ხელმძღვანელობამ მწვრთნელის გაშვება დააჩქარა.

შეგახსენებთ, რომ იარაბეკი "დინამოს" მთავარ მწვრთნელად 2016 წლის იანვარში დაინიშნა. ამ პერიოდში მან კლუბთან ერთად საქართველოს ჩემპიონატი და დავით ყიფიანის სახელობის თასი მოიგო, ევროტურნირებზე კი ჯერ ჩემპიონთა ლიგის მესამე საკვალიფიკაციო რაუნდში ზაგრების "დინამოსთან", შემდეგ კი ევროპალიგის პლეი ოფში პაოკ-თან დამარცხდა.