10 წლის შემდეგ: როცა დრო გმირობას ვერ ახუნებს

ზუსტად 10 წელი გავიდა სტამბოლის ჯადოსნური ფინალის შემდეგ, სადაც "ლივერპულმა" ფეხბურთის ისტორიაში ერთ-ერთი საუკეთესო "ქამბექი" შემოგვთავაზა "მილანთან" და 0:3 ჩამორჩენის შემდეგ ჩემპიონთა ლიგა მოიგო პენალტების სერიაში.

10 წელი დიდი დროა - ვნახოთ, რას აკეთებენ იმ დაუვიწყარი საფეხბურთო სპექტაკლის მონაწილეები. ფაქტია, იმ ფინალს ჩვენს წარმოდგენაში ვერაფერი გაახუნებს. ვისურვოთ, რომ კარსმომდგარი ბერლინური თრილერი მას დაემსგავსოს.

ეჟი დუდეკი
2005 წლის 25 მაისს პოლონელმა გადამწყვეტი თერთმეტმეტრიანი მოიგერია. მან ანდრეი შევჩენკოს არ გაატანინა. 2007 წელს წავიდა "რეალში" და სათადარიგო გახდა. იმ ფინალის შემდეგ მხოლოდ 10 მატჩი ჩაატარა. კარიერის ბოლო მატჩი პოლონეთის ნაკრებში გამართა, ლიხტენშტეინის წინააღმდეგ. ახლა უეფას ელჩია.

სტივ ფინანი
2007 წელს წავიდა ესპანეთში. "ესპანიოლში" ტრავმებმა შეაწუხა. დაბრუნდა ინგლისურ "პორტსმუთში". ფეხბურთიდან წავიდა "პორტსმუთთან" წაგებული სათასო ფინალის შემდეგ. სადღეისოდ ლონდონის ერთ-ერთი სამშენებლო ფირმის ხელმძღვანელია.

ჯეიმი კარაგერი
მაშინდელი "ლივერპულის" ერთ-ერთი სიმბოლო. მთელი კარიერა "ლივერპულს" შესწირა და 737 შეხვედრა ჩაატარა ენფილდელთა რიგებში. მოიგო ორი თასი. დღეს "სქაი სპორტის" პოპულარული ექსპერტია.

სამი ჰიიპია
2009 წელს "ენფილდმა" იტირა, როცა ფინელი გააცილა. "ბაიერში" დაასრულა კარიერა და ორი წლის განმავლობაში გერმანულ კლუბს წვრთნიდა. გაათავისუფლეს 2014 წლის აპრილში. ბოლოს "ბრაიტონში" ჩაუშვა ღუზა, თუმცა წარმატებას ვერც იქ მიაღწია.

ჯიმი ტრაორე
მალელი "ლივერპულიდან" 2006 წელს წავიდა. ითამაშა "ლანსში", "ჩარლტონში", "პორტსმუთში", "რენში", "ბირმინგემში", "მონაკოსა" და "მარსელში". ბოლოს "სიეტლში" იყო და კარიერა ოკეანეს გაღმა დაასრულა.

ჩაბი ალონსო
მთელი ათი წელი ავანგარდშია. "რეალთან" და ესპანეთის ნაკრებთან ერთად, ყველა შესაძლებელი ტიტული მოიგო. "ლივერპულმა" სტამბოლის ფინალიდან 4 წელიწადში გაყიდა "რეალში" და დღემდე ნანობს. დღეს მიუნხენის "ბაიერნის" ერთ-ერთი ლიდერთაგანია.

ლუის გარსია
2007 წელს ესპანელი სამშობლოში დაბრუნდა. ითამაშა "ატლეტიკოში", "რასინგსა" და "პანათინაიკოსში". ძალები მოსინჯა მექსიკურ "პუმასსა" და "პუებლაში". მოულოდნელად გადაბარგდა ინდოეთში, სადაც "კალკუტაში" ჩაირიცხა.

სტივენ ჯერარდი
ბოლო დროს "ლივერპულის" ლეგენდას საუკეთესო პერიოდი არ უდგას. ფეხის დაცდენა და პენალტების ვერგატანა მისთვის ჩვეულებრივი ამბავი გახდა. მისი ბოლო მატჩი "ლივერპულში" კოშმარული იყო - მარცხი "სტოკთან", 1:6. სტივი ჯის ამერიკულ "ლოს ანჯელეს გალაქსიში" ელიან.

იონ-არნე რიისე
ნორვეგიელმა "ლივერპულიდან" წასვლის შემდეგ ითამაშა "რომასა" და "ფულემში". ახლა ის კვიპროსულ აპოელ-შია და კუნძულის კლუბთან ერთად ჩემპიონთა ლიგაც დააჭაშნიკა. მოიგო კვიპროსის ჩემპიონობა და თასი.

ჰარი კიუელი
2008 წელს "გალათასარაიში" გადავიდა. 3 წელი თურქეთში, მერე კი ავსტრალიური "მელბურნი". მოასწრო ყატარულ "ალ გარაფაში" თამაში. ტრავმებმა გააწამა და ერთი წლის წინ გამოაცხადა კარიერის დასრულების შესახებ.

მილან ბაროში
ჩემპიონთა ლიგა მოიგო თუ არა, "ასტონ ვილაში" წავიდა. ამის შემდეგ ითამაშა "ლიონში", "პორტსმუთში", "გალათასარაიში", "ანთალიასპორში"... დღეს მოკრძალებულ "ბანიკში" თამაშობს. 2001 წელს სწორედ "ბანიკიდან" გადავიდა ის მერსისაიდელთა რიგებში.

ვლადიმირ შმიცერი
სტამბოლში შეაგდო გოლი და მატჩის შემდეგ პენალტი. ეგრევე წავიდა "ლივერპულიდან" და ითამაშა "ბორდოში". 2010 წელს დაასრულა კარიერა მშობლიური "სლავიას" შემადგენლობაში. მუშაობდა ჩეხეთის ფეხბურთის ფედერაციაში, დღეს კი დასაქმებულია ორგანიზაციაში "ფეხბურთი რასიზმის წინააღმდეგ".

დიტმარ ჰამანი
"ენფილდზე" "კაიზერს" ეძახდნენ. ნატკენი ფეხით შეაგდო პენალტი ფინალში. მოიგო ინგლისის თასი და წავიდა "სიტიში". მისი კარიერა 2011 წელს მორჩა "მილტონში". იქ მოთამაშე მწვრთნელი იყო. იმუშავა "ლესტერსა" და "სტოკპორტში", რის შემდეგაც ტელეწამყვანის კარიერა აირჩია. იყო ბანკის მრჩეველი და ერთი ხანობა, აზარტულ თამაშებშიც ჩაეფლო.

ჯიბრილ სისე
ვერ გაამართლა მოლოდინი. ახლა ფრანგულ "ბასტიაშია", თუმცა ამ გუნდის ძირითადში ვერ ხვდება. უხმობენ ამერიკაში, ინდოეთსა და პოლონეთში.

რაფაელ ბენიტესი (მწვრთნელი)
ექვსი წელი გაატარა "ლივერპულში". მერე იყო "ინტერი" და "ჩელსი". ახლა"ნაპოლიშია" და გუნდს, ალბათ, უახლოეს დღეებში დატოვებს. უწინასწარმეტყველებენ მადრიდის "რეალში" მისვლას.

დიდა
"ინტერნასიონალის" მეორე მეკარეა. წლეულს მხოლოდ 1 მატჩი ჩაატარა და დიდი ალბათობით, გუნდს დატოვებს.

კაფუ
მთელ მსოფლიოში მოგზაურობს, როგორც ბრაზილიური ფეხბურთის ელჩი. მონაწილეობს საგამოფენო მატჩებში.

იაპ სტამი
სამი წლის განმავლობაში "მანჩესტერ იუნაიტედის" სკაუტი იყო. მერე წვრთნიდა "ზვოლეს". ახლა "აიაქსის" უკანახაზელებს ეხმარება სრულყოფაში.

ალესანდრო ნესტა
"მილანის" მერე გადავიდა კანადურ "მონრეალში". მერე კარიერის დასრულების თაობაზე გამოაცხადა, თუმცა ახლა ინდურ "ჩენაი ტიტანსში" თამაშობს.

პაოლო მალდინი
გამოაცხადა, რომ მწვრთნელი არასოდეს იქნებოდა. არ წავიდა "ჩელსიში" კარლო ანჩელოტის თანაშემწედ. მაიამიში შექმნილი ახალი საფეხბურთო კლუბის თანამფლობელია.

ანდრეა პირლო
"იუვენტუსის" შემადგენლობაში ჩემპიონთა ლიგის ფინალისათვის ემზადება. მალე "ბებერი ქალბატონი" "ბარსელონას" წინააღმდეგ წარდგება.

ჯენარო გატუზო
ჯერჯერობით უნაყოფოდ ცდილობს, იპოვოს საკუთარ თავში მაღალი დონის მწვრთნელი. ამბობენ, რომ შესაძლოა, მალე მახაჭყალის "ანჟი" ჩაიბაროს.

კლარენს ზეედორფი
"მილანის" მწვრთნელობის ხათრით ფეხბურთის თამაშს შეეშვა. მაშინ "ბოტაფოგოში" იყო. ამ პოსტზე დიდხანს ვერ გაძლო და ის ფილიპო ინძაგიმ შეცვალა.

კაკა
ერთ დროს მსოფლიოს საუკეთესო ფეხბურთელი ახლა "ორლანდოში" თამაშობს.

ანდრეი შევჩენკო
ვერ იპოვა საკუთარი თავი პოლიტიკაში. აიღო პრო-სამწვრთნელო ლიცენზია და ახლა შესაბამის სამუშაოს ელის.

ერნან კრესპო
"პარმას" დუბლშემადგენლობას მოძღვრავს. ჯერ გაურკვეველია, დარჩება თუ არა კლუბში.

რუი კოშტა
"ბენფიკას" სპორტული დირექტორია.

სერჟინიო
"მილანშია" და მარკეტინგის სფეროში მუშაობს. ამასთან ერთად, კლუბისათვის ტალანტებს ეძებს ბრაზილიაში.

იონ  დალ ტომასონი
2014 წელს ჰოლანდიური "როდა" ჩაიბარა. მხოლოდ ხუთი თვე გაძლო ამ პოსტზე. ცხოვრობს ჰოლანდიაში.

კარლო ანჩელოტი (მწვრთნელი)
გასულ წელს "რეალს" ჩემპიონთა ლიგა მოაგებინა, მიმდინარე სეზონში კი ვერც პრიმერა დაინადავლა და ვერც ევროპის უპირველესი ტურნირის უმთავრესი ჯილდო. "რეალიდან" დაითხოვეს. ან პაუზას აიღებს, ან "მილანს" დაუბრუნდება.

ყოველდღიური სპორტული გაზეთი "ლელო"